Канфэрэнцыю «Новая Беларусь», прымеркаваную да пяцігодзьдзя жнівеньскіх падзеяў 2020 году, адкрыла Сьвятлана Ціханоўская.
«Гэтая рэвалюцыя яшчэ ня скончаная, пакуль мы разам, пакуль мы працягваем барацьбу — мы не прайгралі. Я не разумею людзей, якія прапануюць адмовіцца ад 2020 году і перагарнуць старонку. Гэта той год, калі мы адчулі сябе нацыяй», — заявіла Сьвятлана Ціханоўская.
Паводле яе, на канфэрэнцыі плянуецца абмеркаваць, што рабіць далей, бо новы час патрабуе новых форм.
«Магчымае перамір'е па Ўкраіне, якое будзе абмяркоўвацца ў бліжэйшыя тыдні, адкрые акно магчымасьцяў і для Беларусі. І нам трэба быць да гэтага гатовымі. Гэта тое, дзеля чаго мы сабраліся сёньня тут», — сказала Сьвятлана Ціханоўская.
Канфэрэнцыя "Новая Беларусь" у Варшаве. 9 жніўня. Онлайн-выступ старшыні Рады БНР Івонкі Сурвілы
Сярод тэм — як вызваліць палітвязьняў, як умацаваць беларускі рух у сьвеце, як падтрымаць тых, хто ўнутры краіны і як прыцягнуць рэжым да адказнасьці.
«Мы яшчэ не перамаглі, але і не прайгралі. І тая ўвага да нашай канфэрэнцыі — ад лукашэнкаўскіх спэцслужбаў і расейскіх прапагандыстаў — яшчэ раз даказвае, як мы ім перашкаджаем. І рэжым памыляецца, калі думае, што нас запалохае і прымусіць капітуляваць. Не дачакаюцца. Мы прадоўжым працаваць, пакуль не дасягнем сваіх мэтаў», — заявіла Сьвятлана Ціханоўская.
Канфэрэнцыя "Новая Беларусь" у Варшаве. 9 жніўня. Сяргей і Сьвятлана Ціханоўскія.
Канфэрэнцыя праходзіць у Варшаўскім унівэрсытэце, які шмат гадоў дапамагае беларускай моладзі.
Ян Маліцкі
Як паведаміў Ян Маліцкі, дырэктар цэнтра ўсходнеэўрапейскіх дасьледаваньняў Варшаўскага ўнівэрсытэту, гэтая навучальная ўстанова ўжо падрыхтавала 96 беларусаў, якія змогуць працаваць дыпляматамі пасьля зьмену рэжыму ў Беларусі.
«Я жадаю вам перамогі, вяртаньня дадому і пабудаваць Новую Беларусь», — сказаў Ян Маліцкі.
Канфэрэнцыя "Новая Беларусь" у Варшаве. 9 жніўня. Палітыкі Павал Латушка, Франак Вячорка, Вольга Зазулінская, Арцём Брухан, Лізавета Пракопчык, Аляксандар Мілінкевіч
Паводле арганізатараў, у канфэрэнцыі бяруць удзел 420 чалавек, у тым ліку прыблізна 50 дыпляматаў. Усе яны прыехалі з 16 краін сьвету.
Што кажуць сацыёлягі
Старшы дасьледчык Цэнтру новых ідэяў (ЦНІ) Генадзь Коршунаў прадставіў вынікі дасьледаваньня «5 гадоў беларускай рэвалюцыі вачамі актыўнай часткі прадэмакратычнай супольнасьці».
Генадзь Коршунаў
90 % апытаных адзначылі, што падзеі 2020 году цалкам або істотна зьмянілі іхнае жыцьцё. «Такая ж колькасьць адказалі, што дзейнічалі б таксама альбо нават больш актыўна», — сказаў Генадзь Коршунаў.
«З справаздач правааабронцаў мы ведам, што рэпрсіі працягваюца, але таксама ведаме, што ўлады намагаюцца прыхаваць іх маштаб. Прынамсі, за два гады колькасьць людзей, да якіх дайшлі тыя ці іншыя рэпрэсіі павялічылася. Цяпер толькі траціна кажа, што іх рэпрэсіі не закранулі», — дадаў сацыёляг.
Паводле яго, сярод беларусаў ёсьць кансэнсус наконт даверу палітычным дзеячам.
«На першым месцы Сьвятлана Ціханоўская, другое месца — Павал Латушка. Далей. Сяргея Ціханоўскага ведаюць даволі шмат, але даверу вялікага яшчэ няма. Далей Франак Вячорка і Зянон Пазьняк. Шчыра кажучы, спадар Пазьняк у апошнія гады давер страціў вельмі моцна», — паведаміў Генадзь Коршунаў.
Якія праекты беларусаў лепшыя
Удзельнікі дыскусій мяркуюць, што за апошнія пяць гадоў найлепшымі беларускімі ініцыятывамі сталі Маратон салідарнасьці, Каардынацыйная рады, Міжнародны гуманітарны фонд, полк Каліноўскага, Кібэрпартызаны, Гаюн.
На канфэрэнцыі прадставілі два аналітычныя дакумэнтаў
У прыватнасьці, Аліна Харысава прадставіла абноўлены дакумэнт Red Paper з вызначанымі рызыкамі, якія стварае рэжым Аляксандра Лукашэнкі для бясьпекі Эўропы. Раней дакумэнт перадалі ў NATO. Сярод рызыкаў вызначаныя — вайсковая, энэргетычная, міграцыйная і моладзевая бясьпека.
Прадстаўнік аб’яднаньня былых сілавікоў BelPol Мацьвей Купрэйчык прадставіў справаздачу аб удзеле рэжыму ў расейскай агрэсіі супраць Украіны. Паводле яго, Аляксандар Лукашэнка «дакладна ведаў аб тым, што Расея пойдзе вайной на Ўкраіне».
«Яны ведалі, дапамагалі і спрыялі ўсімі сіламі», — падкрэсьліў ён і дадаў, што ў справаздачы ёсьць доказы гэтага.
У рамках канфэрэнцыі ў другой палавіне дня ў Варшаве прайшоў марш салідарнасьці. Аналягічныя акцыі адбываюцца ў 18 краінах сьвету.